dongeng bahasa sunda

Si Kabayan  Ngala Tutut

Batur  saimah  geus harudang.Mitohana geus ka huma.Pamajikanana geus lila di dapur,naheur cai jeung nyangu.

Tapi Si Kabayan mah kukulisikan keneh bae di pangkengan.Unggal digeroan ku pamajikanana ,jawabna teh,” Ke sakedeung deui,kapalang ku ngimpi.”

Pamajikanana keuheuleun,tungtungna mah diantep we.

Diantep teh kalah ka beuki tibra sarena,kerekna mani sesegor.

Ditoong ku pamajikanana tina sela-sela bilik,Si Kabayan keur nangkarak bengkang,teu dibaju.Beuteung nyemplu,buuk kusut.

Pamajikanana nyokot jeujeur useup.Teu anataparah deui,beuteung salakina dirojok.

Si Kabayan ngagurubug,bari ngagero,”Pegat ti lebak,kade lepas!”

“Naon pegat ti lebak?” Si Iteung pamajikanana nyentak.

Si Kabayan  ngorejat hudang,nenjo pamajikanana nangtung bari nyenyekel jeujeur useup.”Siah ngaganggu! Kami keur ngimpi newak kancra.Geus weh lepas deui,da ku maneh digamahan!”

            “Lain ngomong teu puguh.Anggur neangan deungeun sangu kadituh! Sangu geus asak.Na rek dahar karo uyah ?”

“Neangan deungeun sangu ka mana,sakieu geus berangna ?”

“Ngala-ngala tutut kadinyah,urang angeun,di samaraan mah aya.”

Si Kabayan kuniang hudang bari gegetret.Gejlig indit ninggalkeun imahna,bari kukulutus,”Keur ngeunah-ngeunah ngimpi di ganggu!”

“Na moal  ka cai heula ?” pamajikanana nanya.

“Moal,”jawab Si Kabayan, “engke we mandi di sawah,ambeh caina haneut.

Si Iteung ngalelengkur di dapur,salakina can jol keneh bae.

“Na kamana mangkeluk teh,pilakadar ngala tutut.Mani lila-lila teuing!” Si Iteung ngomong sorangan.

Ku lantaran Si Kabayan ngampleng bae,kencling we Si Iteung nyusul.

Kasampak Si Kabayan keur cingongo we dina galengan,bari nyenyekel awi panjang.

“Keur naon maneh,Kabayan ?”

“Kapan keur ngala tutut.Lain rek ngangen ?”

“Moal enya ngala tutut dikorean kitu tina galengan.Ancrub kadinyah!”

“Embung sieun titeulem.Tuh sakitu jerona.Langit oge kadeuleu.Na maneh daek jadi randa?”

Si Iteung keuheuleun.Teu antaparah deui,salakina dijongklokkeun.

Gujubar weh Si Kabayan ngagujubar ka sawah beunang nanduran,bari ngagero, “Eh,da deet......!”

Si Iteung teu ngomong.Ngungkung be balik bari kukulutus, “Engke deui mah mun ngala tutut tong dikorean.Rungkup we sakalian ku heurap!”